Men Mudri Medagang 'Darling'

Sedek dina anu, Men Mudri maan mesliahan ke Kota Gianyar. Sawetara jam 6 sore, ia ngesir lewat di Jl. Ngurah Rai, kegandeng sepeda montor teken mantune  I Gede Semara Muda. Angob keneh ipun ngantenang Kota Gianyare jani. Katonang ipun perubahan Kota Gianyare mangkin, sekadi lampu penerangan jalane  ngeredep meprada, sebilang tiang lampu medaging telung lampu putih nyalang, bunter-bunter buka bulan  purnama di sasih kapate.  

‘Stop…stop….stop, uwup dini malu’, keto Men Mudri memunyi teken mantune, sambilange ngedig-ngedig tundun I Gede, apang tuwunanga di sisin jalane, pas di depan proyek Pasar Rakyat Gianyare

‘Kenken Me, adi stop dini ? Meme nak kebelet ngenceh? Tahan buin kesep Me, ditu bedauh di seberang taman air mancure ada pos Pol PP  misi toilet, nak  dadi silih toiletne, bares tur ramah-ramah petugas jagane !’. Inget ya I Gede, ipidan enu rame ‘kar pri de’ ne dugas setonden wabah covide, ngelah ia pengalaman nyilih toilet ditu.

‘Apa petang cai De’, Meme tusing kebelet ngenceh. Meme dot mebalih, apa ja totonan cara bade tegeh ngolet, melinder beduwur sliwar-sliwer misi lampu.

‘Oh…ento madan tower crane Me, alat-alat proyek, apang aluhang megae, apa buin ngangkat barang-barang berat’

Men Mudri geleng-geleng kepala teken kecanggihan teknologi zaman janine. Kipak-kipek muwane nuwutin alat-alat berate megae. Ditu, ipidan, di tengah pasare ane nedeng megeburan jani, Men Mudri medagang canang. Kerana ada proyek, megingsir ia ngalih tongos elenan. Tusing taen ia ngelah keneh sengsaya, kerana suba maan nomor medagang buin yening pasare suba grand opening. Kone ia lakar tetep maan tongos medagang di pasar Gianyare ane baru ento.

‘Me…Meme, suwud monto melamun mebalih lampu, mai mulih, dedauhan suba ngancan wayah. Ne suba jam kutus. Pedalem cucune pecruet ngantosang gapgapan. Mai meli godoh ditu dajane, sik Mas Jawa langganan cang’, I Gede ngedeng liman matuane.

Sambilanga nyebrang jalan nuju dagang godohe, I Gede terus nyatwa. ‘Jani Meme harus melajah medagang daring nah !, nyanan beliyanga ja hape android. Cucune orahin ngajahin adeng-adeng’

‘Apa madan medagang darling De ?’ pesaut I Meme.

‘Aruh…. Meme, daring Me, tusing ja darling.  Yen  darling i love you,  mara ada. Daring ento singkatan dari kata dalam jaringan. Bahasa Inggrisne on line, medagang di internette to’. I Meme masih bengang bengong tusing ngerti teken satwa mantune.

‘Zaman jani anake ngorahang medagang di olshop alias online shop’ I Gede ngelanjutang satuwane.

‘Aroooooh… pusing Meme’ ningeh satuan caine. Ane tunian medagang darling, ane jani medagang ololsop. Ololsop to medagang makanan? ngolol ajak ngesop. Medagang makanan ane gebuh-gebuh, ane mekuah-mekuah ? apang tusing misi meciplakan, tinggal olol…sop…olol…sop, cara nginem daluman utawi naar ongol-ongol, keto ?

‘Aruhhhhhh….Meme’, adi Icang ane pusing jani ?

Risampune ring ajeng Mas Jawa, dagang gorengane...

‘Godoh sepuluh ribu Mas Jawa’, I Meme memesan gorengan

‘Mbonten wonten Bu’, pisang goreng mau ?

---

Ilustrasi foto:  dari Instagram Anom Manik Agung