Cerpen Mebasa Bali "Ketut Lara lan Tukang Sulap"

Ditu, di batan punyan Kepahe, di Setra Pura Dalem, I Ketut Lara negak

meplisahan. Sengal-sengal angkihanne, menek-tuwun tangkah ipun, nerugtug care lakar makeplag. Untung ia tusing ngelah penyakit jantung. Yen ngelah penyakit ento, cara pejabat-pejabat ane jani, pastika sube ia lakar milu lampus, nugtug pejalan memene ane nedeng kageseng olih rumurub Sang Hyang Brahma di pamuwunanne.

Nerambang sawang kenehnyane, inget teken lacur idup di mercapadene ene. Uli cerik ia sube katinggalin lampus Bapane, jani risedek ia suba teruna, giliran memene ane ngalahin. I Ketut Lara anak paling cerik, menyama ajak patpat. Imbokne luh-luh tetelu, suba nganten kapisage. Enu I Ketut dogen jumah ajak memene, nyeledi garis keturunan purusa, ngelanjutin ayah-ayahan di banjar.

I pidan, keto anak di banjar nyatuang. Keluarge Ketut Lara tuwah kluarga ngelah. Ngelah carik, tegalan. ngelah masih utsaha penyosohan padi. Nanging sasukat Bapane gelem-geleman, apang satak keti masuk rumah sakit, sake besik pagelahanne megade. Keranea tusing nyidayang mayah tatebusan, telah peglantes ilang sakayan Bapane ento, nanging masih enu penyosohan padine dogen.

Care sesonggane ‘untung sing dadi alih, lacure sing dadi kelidin’, keto upamian idup ipun. Ritatkala I Ketut Lekad, Bapan ipune lantas lampus. Ento mawinan I Ketut keadanin I Ketut Lara. Mule lara sajan idup ipune. Mara tuwuh a oton, utsaha penyosohan padi ane kelanjutin olih memene suba pindah tangan. Memene tusing sida ngelanjutin utsaha penyosohan beras, kerane ia belog polos setata bakat uluk-uluke teken  timpal-timpalne.

I Ketut Lara kaubuh Memene, Ni Luh Asih, kaempu masih teken imbok-imbokne ane suba bajang-bajang. Di Sekolah Dasar ia masekolah di SD Inpres. Imbok-Imbokne kangguange masekolah kanti tamat SMA dogen. Lanjut makuli, ada megae di toko, ada di percetakan, ada masih di kantor swasta. Sabilang peteng makejang tragia  nguwopin majejahitan ceper, nanding canang anggon I meme madagang canang di pasar. Ada rasa bagia I Ketut, kerane ia sayanga teken Memene tur imbok-imbokne. Tohange ia masekolah kanti sekolah tinggi. Di SD, SMP, SMA ia jemet melajah, setata maan rangking tur juara kelas. Setamat SMA katerima di Fakultas Teknik Udayana. Kendel sajan keneh ipun, keto masih bangga meme lan imbok-imbokne. Ulian madagang canang nyidayang masekolahin pianakne kanti sekolah tinggi.

Dugas kuliah di Denpasar, ia numpang di umah ipahne di Sesetan. Ipahne tusing keberatan, malah demen, kerana ada ane ngempu tur ngajahin melajah pianak-pianakne. Empat tahun 3 bulan, I Ketut Lara presida namatang kuliahne. Sing perlu keweh-keweh nglamar kemu mai ngalih gae,  ada perusahaan BUMN ane suba sadia lakar nerima ia megae.

Ane jani, tonden presida iya ngewales budi I rerame, saget I meme suba ninggalin lampus. Dugas a bulan, suwud piodalan di sanggah gede, memene nu seger oger. Enu kuat cagcag-cigcig ngaturan ayah, ne jani suba kaborbor di pamuwunane. Tusing side nandahang sebet keneh ipun. Mule amonto tuwah urip memen ipun.

Dugas enu maurip, Ni Luh Asih, keto adan memene I Ketut, mule anak balu belog polos, nanging ngelah budi welas asih tur jemet pesan mapitulung ka pisaga, ento mawinan makejang anake di bebanjaran mebalik mapitulung rikala pengabenan memene ene.

Kasirsir baan angine ring Setra, neteg-netegang bayune I Ketut Lara. Kanti iya suba bisa nerima keadaan,  tulus, sapeninggal memene ane sanget pisan tresnain ipun. Unduk prebeye pengabenan, I Ketut tusing buin  ngenehang pesan, ngelah iya tabungan di BRI, memene masih ngelah   tabungan deposito di LPD, Imbok lan ipah-ipahnyane masih milu  mapitulung. Ade ane nyumbang wadah utawi bade, celeng, taluh bebek, buah nyuh tur reramon, tiying, ade masih ane ngenjuhang marupa pipis.

Buda Pon Medangkungan, rahinane jani, mule dewasa pengabenan sane katibak saking Nak Lingsir, Siwan ipun ring Geria Duwur Beji, dedauhane sewetara jam roras tengai nepet, suaran kulkul ring Banjar Batan Timbul kasuarang olih pengurus adate. Pagrudug krame banjar macelep ke umah I Ketut, Kauk-kauk Kelihan Adate nreptiang kramane. Suaran Bleganjur taler sampun ka tabuh, nerugtug lan makeplag rasa tangkahe ningehang tetabuhanne ento.

I Ketut Lara,  nyaman-nyaman ipun, keto masih krame banjar ane lenan menek ke bale dangin, sahaya negen tur ngatag watangan I Meme pesu ke diwangan. Ditu di samping angkul-angkule suba tragia wadah utawi bade nyantosang, lakar  ngater watangan memene ke setra adate bedelod.

Sahasa tengkejut…., makesyab sanget pisan ipun I Ketut Lara ngantenin sekancan juru sandang bade sampun ngangge kaos seragam masuryak suryak maebo arak lan bir.  Ipun merasa-rasa tan naenang ngaturang kaos ring keramene, keto masihr ipah utawi nyaman-nyaman ipune. Suwe telektekin ipun gegambaran sane wenten ring kaos oblong punike, wenten foto anak lanang sareng kalih, makenyem, taler  madaging tulisan ‘Pilih Pasangan Nomor Satu, Calon Pemimpin TOP MARKOTOP !!!’

Ngetor batisne I Ketut ngantenang unduke ento, limane ngejer, gigine ngeretek, tusing prasida maujar nang a buku. Kolongane care kaseluk, kaku, care anake kolok. Nanging geden-gedenang ipun bayun ipun, kanti sing merasa suba teked arak-arakan badene ring setra, ditu iya maplisahan negak di batan kepuhe, ngeling, ngingetang buin baan  laran ipun sane ten surud-surud. Wenten anak ‘mapiolas pape’ mapiolas nanging nandehang keneh lara, jeg sahaya  tanpa sadok, ngedum-ngeduman baju kaos kampanye, jengah keneh ipun. Wenten anak sane ngambil kesempatan lan keuntungan ring yadnya sane kewangun.

“Tut, ede cai sedih buka keketo”

“ Oh… Bli Gede, kadenan tiyang nak nyen” makesyab I Ketut matolihang teken anak muani gede ganggas makumis jembre, tur makace mata selem, ane mare sajan maujar teken ipun

“Suksma Beli, suba mulih nyaksinin pengabenan I Meme, doh-doh Beli uling kota” keto  sambung pesaur I Ketut.

“Tut, ede cai sanget makesyab unduk baju kampanye ane anggone teken tukang sandang badene ento, Beli mula ane mensponsori” Beli Gede mesaur sambilange nglepusang  rokok kretekne.

“Offthe record nah Tut, Beli maan target pemenangan kandidat calon, dini di desan Ketute, yening kanti kalah suara kandidate ane tohang Beli dini, lascarya Beli bakal kena mutasi, ilang jabatan Beli ane ‘belus’ di pemerintahan buka jani”

Tusing pesan I Ketut bisa mesaur buin, kerasa benyah latig tangkah ipun, wenten sinalih tunggil penyaman ipun maboya asapunika ‘dados tukang sulap’,  praside nyulap upacara dados ajang kampanye.

Meme dewaratu………!!!